02.03.1993 с.
* * *
Көр, хоhоон алыптаах тардыыта
Арыгы, хомуhун кэриэтэ,
Мин сааспар киниттэн куотарым,
Тиhэђэр киниэхэ хаптардым.
Киhиэхэ хааныгар быhыылаах
Бу дьаллык арахпат муокастаах,
Тођооhу, тyгэни тоhуйар,
Ыйыта барбакка хоhуйар.
Наука кyлyгэр саhаары
Төбөбyн ођустуу көлyйтyм,
Арахпат дьаллыктан тэйээри
Нууччалыы саңађа көспyтyм.
Ыарыытын, дьођурун билбэтим
Айылђа бу маннык дьиктитин,
Хайа да ньыманан куоппатым
Хоhоон диэн таарымта ыгарын.
Солуулаах курдуктук аахпатым
Мин хоhоон кылбаарар кынатын,
Бу хойут тиhэђэр өйдөөтyм
Эдэрбэр элбэхтик сыыспыппын.
12.02.1993 с.
03.02.1993 с.
* * *
Дьиэлэри көтyрэр yгэстэр
Сахађа биир ыарыы буоллулар,
Ааспыты “тупсарар” туhугар
Аналлаах курдуктар кинилэр.
Муң саатар көтyллэр дьиэлэри
Суоруңңа таhааран биэрбэттэр,
Урукку олорбут олођу
Туоhулуур курдуктук туппаттар.
Омукпут олорбут олођун
Ол кэннэ дьэ хантан билэђин,
Биирдии дьон тус дьиэтин таптыырын
Туоххунан ођођор тиэрдэђин?
Кyннээђи олоххо туох баарын
Көтyрэ-алдьата тураммыт,
Ођођо халлаантан ыламмыт
“Yгэскин сөбyлээ” диэхтиибит.
Тус-бэйэ буолбатах музейтан
Ааспыты таптата барбаккын,
Ыал киэнин бэйэтин малыттан
Ордугу оннукка булбаккын.
14.03.1996 с.